महेन्द्रनगर । अछाममा आफैंमाथि गोली चलाउने प्रहरी सहायक निरीक्षक असई किसनबहादुर चन्दको प्रकरणमा छानबिन प्रतिवेदन बुझाइएको छ। तत्कालीन सुदूरपश्चिमका डीआईजी रविन्द्र केसीद्वारा गठित छानबिन समितिले रिपोर्ट बुझाएको हो।
सो रिपोर्टमा असईको गल्ती ठहर गर्दै उनलाई संगठनबाट बर्खास्त गर्न सिफारिस गरिएको छ। घटनाको छानविन गर्न सुदूरपश्चिम प्रदेश प्रहरी कार्यालय धनगढीले गठन गरेको डोटी प्रहरीका प्रहरी उपरीक्षक एसपी बिनोद शर्माको नेतृत्वमा समिति बनाएको थियो। त्यसपछि समितिले चन्दलाई बर्खास्त गर्न सिफारिस गरेको हो।
प्रदेश प्रहरी कार्यालय स्रोतकाअनुसार चन्दले मदिरा सेवन गरेर आफैंमाथि पेस्तोल चलाएको, विगतमा पनि विभिन्न प्रहरीमाथि गोली ताक्ने काम गरेको जस्ता कारणले संगठन राख्न उपयुक्त नदेखिएको भन्दै समितिले उनलाई बर्खास्त गर्न सिफारिस गरेको हो।
प्रदेश प्रहरी कार्यालयका तत्कालीन डीआईजी केसीले छानविन समितिले प्रतिवेदन बुझाएको बताउँदै चन्दलाई कारवाही गर्न सिफारिस गरेको पुष्टि गरे। तर, अहिले उनी नेपाल प्रहरी अस्पताल काठमाडौँमा उपचाररत भएका कारण थप कारवाही प्रक्रिया अघि नबढेको बताए।
‘छानविन समितिले प्रतिवेदन पेश गरिसकेको छ,’ उनले भने, ‘उहाँको पनि बयान लिएर कागज गरिसकेपछि प्रक्रिया अघि बढ्छ होला।’
अछामको तुर्माखाद गाउँपालिका–३ को भैरवस्थान प्रहरी चौकीका इन्चार्जका रुपमा कार्यरत चन्दले १३ मंसिरको राति आफैंमाथि पेस्तोल चलाएका थिए। घटना भएको दिन समेत चन्दले प्रहरी चौकीमा कार्यरत प्रहरी हवल्दार गगन चन्दमाथि गोली प्रहार गर्न खोजेको स्रोत बताउँछ तर उनी भागेपछि आफैमाथि पेस्तोल प्रहार गरेको देखिएको छ।
‘मापसे गरेर सुरुमा प्रहरी हवल्दारमाथि पेस्तोल प्रहार गर्न खोजेको देखिन्छ तर उनी त्यहाँबाट भाग्न सफल भएछन्,’ प्रहरी स्रोतले भन्यो, ‘पछि आफूलाई अमिताभ बच्चनको जस्तै एक्सन गर्न आउँछ भन्दै आफैंमाथि पेस्तोल ताकेको अवस्थामा पड्किएको देखिन्छ।’
चन्दले अन्य दुई प्रहरीलाई पनि सँगै राखेर आफूलाई फिल्ममा जस्तै एक्सन गर्न आउने बताएका थिए। उनले यसअघि कैलालीमा हुँदा समेत एक जना प्रहरी निरीक्षकलाई पेस्तोल ताकेका थिए।
सुरुमा ती असईको टिकटकमा एक भिडिओ हालेको विषयमा विवाद भएको थियो। सो अवाञ्छित भिडिओका कारण असई चन्दले आफ्नै मातहत कर्मचारीलाई शङ्का गरेकोमा विवाद भएको थियो।
विवादका क्रममा मदिरा सेवन गरेका चन्दले हवल्दारलाई पेस्तोल ताकेपछि भागेकोमा उनले आफैंलाई पेस्तोल हानेका थिए। त्यसपछि उनलाई उपचारका लागि नेपालगन्ज लगिएको थियो भने पछि काठमाडौं लगिएको हो।