महेन्द्रनगर चैत्र १७ । राष्ट्रिय आर्थिक गणना २०८२ का लागि कञ्चनपुरमा जिल्ला स्तरीय सचेतना गोष्ठी गरिएको छ । भीमदत्त नगरपालिकाको सभाहलमा मंगलबार आयोजित उक्त कार्यक्रमले आर्थिक गणनाको महत्व, यसको आवश्यकता र सफल कार्यान्वयनका विविध पक्षमा गहन र सार्थक छलफल गरेको छ ।
नेपालको अर्थतन्त्रको वास्तविक अवस्था पहिचान गरी विकास योजनालाई अझ प्रभावकारी र तथ्यमा आधारित बनाउने उद्देश्यसहित सञ्चालन हुन लागेको गणनाका लागि जिल्ला आर्थिक गणना कार्यालय, कञ्चनपुरको आयोजनामा सम्पन्न कार्यक्रममा जिल्लाभरका सरोकारवाला निकाय, सरकारी तथा गैरसरकारी संघसंस्था, सुरक्षा निकाय, उद्योगी–व्यवसायी, सञ्चारकर्मी तथा नागरिक समाजका प्रतिनिधिसित छलफल गरिएको छ ।
कार्यक्रमको अध्यक्षता प्रमुख जिल्ला अधिकारी मदन कोइरालाले गरेका थिए । प्रमुख अतिथिका रूपमा दुर्गा दत्त बोहरा थिए । कार्यक्रममा वरिष्ठ उपाध्यक्ष दिपेन्द्र प्रसाद साउद, महाकाली यातायातका केन्द्रीय उपाध्यक्ष जयराज पन्त, जिल्ला प्रहरी कार्यालयका प्रहरी उपरीक्षक खडक बहादुर खत्री लगायत विभिन्न क्षेत्रका प्रतिनिधि सहभागी भए ।
कार्यक्रममा वक्ताहरूले राष्ट्रिय आर्थिक गणनालाई देशको समग्र आर्थिक संरचना बुझ्ने महत्वपूर्ण आधारस्तम्भका रूपमा व्याख्या गर्दै यसको सफल कार्यान्वयनका लागि सबै पक्षको सक्रिय, जिम्मेवार र समन्वयात्मक सहभागिता अपरिहार्य रहेकोमा जोड दिएका थिए। औद्योगिक क्षेत्र, व्यापार, सेवा, कृषि तथा साना तथा घरेलु उद्यमसम्मका यथार्थपरक तथ्याङ्क संकलनले स्थानीयदेखि संघीय तहसम्म नीति निर्माणलाई मजबुत आधार प्रदान गर्ने विश्वास व्यक्त गरिएको छ ।
प्रमुख जिल्ला अधिकारी कोइरालाले आर्थिक गणना केवल तथ्याङ्क संकलनमा सीमित नभई विकासको स्पष्ट मार्गचित्र निर्माण गर्ने प्रभावकारी उपकरण भएको उल्लेख गरे । उनले सही तथ्याङ्कले मात्रै सही नीति निर्माण सम्भव हुन्छ भन्ने धारणा राख्दै सबै सरोकारवालालाई सहकार्य, पारदर्शिता र जिम्मेवारीसहित आफ्नो भूमिका निर्वाह गर्न आग्रह गरे ।
प्रमुख अतिथि दुर्गा दत्त बोहराले आर्थिक गणनाले स्थानीय तहको वास्तविक आर्थिक अवस्था उजागर गर्ने भएकाले विकास योजनालाई लक्षित, समावेशी र परिणाममुखी बनाउन महत्वपूर्ण योगदान पु¥याउने बताए । उनले आर्थिक पारदर्शिता, उत्तरदायित्व र सुशासन प्रवद्र्धनमा समेत यसले सकारात्मक प्रभाव पार्ने विश्वास व्यक्त गरे ।
अन्य वक्ताहरूले पनि आर्थिक गणनाको प्रभावकारिताका लागि जनचेतना अभिवृद्धि, प्रविधिमैत्री तथ्याङ्क संकलन प्रणाली, पारदर्शी प्रक्रिया तथा जनसहभागिता अत्यन्तै महत्वपूर्ण रहेको औंल्याए। उनीहरूले स्थानीय तहमा आर्थिक गतिविधिहरूको सूक्ष्म अध्ययनले रोजगारी सिर्जना, लगानी प्रवद्र्धन र दिगो विकासका अवसरहरू पहिचान गर्न मद्दत पुग्ने बताएका थिए।
कार्यक्रमले आर्थिक गणनालाई केवल प्रशासनिक प्रक्रिया नभई समृद्धिको आधार तयार गर्ने राष्ट्रिय अभियानका रूपमा अघि बढाउनुपर्ने सन्देश दिएको छ। सहभागीहरूले स्थानीय स्तरमै आर्थिक यथार्थको स्पष्ट चित्रण गर्दै त्यसका आधारमा समावेशी विकास, आर्थिक सशक्तीकरण र दिगोपनालाई सुनिश्चित गर्ने विश्वास व्यक्त गरेका छन् ।
